Los númerus

     Vamus a chalral alreol de los númerus, que son palabrinas que tós ussamus tolus días, ya sea pa dal la hora, pa idil cuánta familia tenemus, pa mental cuánta genti vivi, o palra,... Comu podemus vel, son apaecíus a los del castellanu o el portugués, algu normal pos tóas tres son lenguas que vienin del latín. Asina ussamus los númerus n’El Rebollal. 

Apencipiamus con los que podemus contal con los déus de las manus: unu (1), dos (2), tres (3), cuatru (4), cincu (5), séis (6), sieti (7), ochu (8), nuevi (9) y diés (10). Cuandu no hai ningunu, sería’l ceru (0).

Lo númerus que siguin, del diés p’arriba, son: onci (11), dodi (12), treci (13), catorci (14), quinci (15), dieciséis (16), diecisieti (17), dieciochu (18), diecinuevi (19), venti (20).

Del númeru dodi vieni dodena, palabra qu’ussamus, pol ejempru, pa pedil dodi güevus.

Del venti p’alantri, los númerus se jadin añuyendu, a la decena, los númerus cendillus: ventiunu (21), ventidós (22), ventitrés (23), venticuatru (24), venticincu (25), ventiséis (26), ventisieti (27), ventiochu (28), ventinuevi (29). 

Las decenas, del venti p’alantri, comu podemus vel, son las que más s’apaecin a los númerus en la lengua oficial: venti (20), trenta (30), cuarenta (40), cincuenta (50), sesenta (60), setenta (70), ochenta (80), noventa (90), cien/cientu (100).

Del trenta p’alantri, los númerus se jadin añuyendu, a la decena, los númerus cendillus, uñíus (o desapartáus) pola conjunción "y": trenta y unu (31), cuarenta y dos (42), cincuenta y tres (53), sesenta y cuatru (64), setenta y cincu (75), ochenta y seis (86), noventa y sieti (97),...

Con tó éstu, podemus jadel frasis comu:

-         El mi dagal ya tieni sieti añus.

-         El Rebollal tieni cincu pueblus: Navafrías, Payu, Peñaparda, Villarrubias y Robrea.

-         ¡Dami una dodena güevus, de los baratus!

-         La tu agüela ya tieni ochenta y cincu añus.

Esu cuesta cuatru perras, no es caru.

Las palabrinas del amol

     Tamién en la palra d’El Rebollal tenemus las nuestras palabrinas alreol los amoris. 

Comu no puedi sel menus apencipiamus con la palabra amol y el su prural, amoris.

Entri los verbus, la genti se puedi (y se debi) querel, acarizal, abracilal (dalsi abrazus, lleval en brazus), andal de besiju (dalsi besus),...

Entri las palabras de cariñu, las parejas caicuandu ussan palabras de cariñu comu prenda, capitán/capitana, paloma,...

No sólu ussamus las palabras noviu/novia pa mental a la pareja. Tamién s’ussa muchu amigu/amiga, más que ná cuandu es una tercera presona la que palra d’ellus.

Cuandu los novius van a casalsi, que tamién mentamus comu ajuntalsi y arrecogelsi, primeru tienin d’apregonalsi (dal a sabel a la genti que se van a casal). Muchas vedis s’ussa los dagalis pa mental a los recién casáus o los que van a casalsi. El día la boa, se le dan a los novius los anfileris o la manzana. El pratu típicu las boas era la pipitoria o chanfaina.

Una vés qu’están casáus, se mienta a la pareja comu el mi hombri o la mi mujel.

Con tó éstu, podemus jadel frasis comu:

-         Los dagalis ya s’han apregonáu, prontu s’arrecogin.

-         Esi es el su amigu.

-         ¡Ay, capitana, cuántu te quieru!

-         ¡Dami un besu, prenda!

El mi hombri ha salíu al güertu.

Los diminutivus

      Vamus a vel cómu jademus los diminutivus n’El Rebollal. 

Paninus

     Tenemus dos prencipalis: 

·  Acabandu en –ÍN / -INU. Es l’acabiju prencipal pa mental qu’algu es chicu, lo que nos da palabrinas comu: casina, chiquinu, perrinu, dagalina, sillina, tazoninu, chiquitín,... Es un acabiju típicu de la lengua leonesa, y se da en muchus pueblus charrus y estremeñus.

·  Acabandu en –ITU. S’ussa comu diminutivu cariñosu. Asina da palabras comu dagalitu, hombritu, mujerita,...

Asina podemus jadel frasis comu:

-         ¡Mirái qué perrinu tan guapu!

-         La mujerita vivía n’una casina mú chiquina.

-         Le gusta tomal el café n’un tadoninu.

-         El mi dagalitu está malinu hoi.

Esi pueblín es mú políu, mú guapu.

Palabrinas alreol la naturaleza

     Vamus a conocel angunas palabrinas alreol de la Naturaleza.

Apencipiamus polus lugaris con agua: la llevan los ríus, regatus,... Y la hai en las juentis, podus y podas. 

Polus caminus podemus il polus bosquis, polus práus, y llegal jasta los cotorrus, los montis y los picus.

Nel caminu podemus encontral animalis comu las dorras, los pardalis, agudanievis, pegas, guarrus, gurullas, bujus, jabalinis,...

     Sin olvialmus de los animalis que tenemus en los nuestrus corralis: burrus, gorrinus, vaquis, gallinis, perrus, gatus,...

     Asina, podemus jadel frasis comu:

• El ríu del mi pueblu lleva poca agua esti añu
• La vedina tieni los burrus nel práu
• Mos salió una dorra nel caminu Payu
• ¡Mirái qué pardalis tan políus!