Las cassas

     Vamus a chalral alreol de las palabrinas que tienin de vel con las cassas. Palabras que, comu no puedi sel menus, podemus encontral nel libru "El habla de El Rebollar. Léxico".

Apencipiamus con la palabra cassa, nombri qu’es de los que guardan la “s sonora” y que nusotrus escribimus con dos “SS”. En los nuestrus pueblus, sigún el terrenu que tuviera la cassa, se podían tenel, además del corral, una tená dondi guardal el ganáu y aperus de labranza, y un güil, dondi dormía y s’apajaba’l ganáu. Además, en la parti alta d’estas otras “cassas” podía habel un pajal, dondi guardal las alpacas de paja pa dali de comel al ganáu nel Inviernu.

 Ya en la cassa prencipal, encontramus diferentis partis, comu la codina, dondi se jadía la vía normal, con la su chiminea con las llaris de las que siempri colgaba un calderu pa tenel agua calienti, los vasalis pa los vasus y pratus, las cantaeras pa los cántarus, pucherus (tamién vasus y pratus), el escañu pa sentalsi o echalsi a reposal la comía, la mesa, las sillas y sillus p’arrimalsi a la lumbri,... Tamién en la parti baja las cassas estaban los cilleirus, dondi dormía la genti en camas o catris de jierru que, con el tiempu tuvun colchonis de lana. Antis d’habel bañu en las cassas (que no siempri lo tuvun), se tenía en los cilleirus una palangana con agua pa lavalsi a las mañanas, y un orinal pol baju la cama, pa si jadía falta a la nochi.

     En la parti d’arriba de las cassas, y pol baju’l tejáu, están la troji o el sobráu, el lugal dondi la genti guarda los achiperris, o ponía a secal los frejonis, pol ejempru.

Las palabrinas del Inviernu

Nievi en los tejáus

     Vamus a chalral alreol de las palabrinas d’esti tiempu l’Inviernu. 

Apencipiamus, comu no puedi sel menus, con l’Inviernu o la Enverná, el tiempu más fríu l’añu, un tiempu nel que jadi fríu, y con él vienin los yelus de las nochis y las cencellás de las mañanas. Un tiempu esti de l’Inviernu nel que apaeci la nievi, y tamién un tiempu de muchas niebras.

El fríu es algu propiu d’esti tiempu, y dendi siempri himus luchau contra él de muchus mó y maneras. La prencipal, y la más importanti dendi bien antigu, es el fuegu. Un fuegu que chiscamus o arcendemus en la chiminea. Primeru metemus las piñas, dispués las taramas y arcendajas, que mos ayúan a chiscal la lumbri, y adispués la leña más gorda, con el trashugueru que se poni detrás pa sujetal la lumbri y la demás leña, y los padrinus, a dambus dos láus de la lumbri. Una vés que chiscamus podemus jadel una chamaína (una lumbri chica) o una güena chamaratá (una lumbri grandi).

     Siempri tenemus de tenel cudiáu con las morceñas o pavesas que salin de la lumbri, no sea que chisquin n’otru láu. Cuandu se quema la leña siempri quéa’l borraju, que podemus ussal pa assal comía, ya sea carni, patatis, castañas,... O pa jadel braseru pa ponel pol baju la mesa o calental otras partis de la cassa. Tamién en la lumbri se colgaba’l calderu de las llaris pa tenel siempri agua calienti, y se ponía la comía y el café en los pucherus, la comía pa jadelisi y el café pa tenel siempri café jechu.

El ganáu

     Vamus a apencipial polas crasis de ganáu. Los más grandis eran los güés o bués, que s’ussa pa calni y s’ussaba pa tiral d’aperus, comu’l carru o l’aráu. Tamién pa lo mesmu, anque más chicas, son las vaquis (prural de vaca), y de las que sacamus tamién la lechi, y los torus. Las crías son los bederrus. 

     Otras crasis de ganáu, éstus sin cuernus, son los caballus, los burrus y los mulus, que s’ussaban p’acarreal y pa tiral d’aperus. La cría del caballu es el potru, y la del burru el buchi. Algu más chicas son las ovejas y las cabras. Las crías de las ovejas son los borregus, y las de las cabras los chivinus o cabritus.

     Tamién se crían en los nuestrus pueblus los gorrinus, marranus o cerdus, de los que s’aprovecha tó. Y, ya con prumas y picu, las gallinis (prural de gallina) o pitas, y los gallus o pitus, de los que s’aprovechan la calni y los güevus. Las crías son los pollus y pollas (comu la de la toná).

     Seguimus con otrus animalis, que se tenían en cassa, anque no son ganáu comu tal, son los perrus, que sirvin pa cudial el ganáu, los gatus, pa preseguil ratonis y ratis, y las palombas, de las que s’aprovechaba la calni y los güevus.

Los achiperris de la codina

     Vamus a deprendel cómu se llaman los achiperris qu’ussamus en la codina. 

P’apencipial, la codina, qu’antañu tenía un vassal, una cantaera, la mesa, las sillas y, muchas vedis, un escañu y unus sillus p’arrimalsi a la lumbri.

Pa codinal s’ussaban, ademas de la sartén, los pucherus, que s’arrimaban a la lumbri pa jadel la comía, el café,... Más nuevas son las caduelas. Tampocu no faltaba un calderu colgáu de las llaris pa tenel agua calienti siempri.

Una vés sentáus a la mesa podiamus ponel en ellas los pratus pa comel, los vasus pa bebel y, comu cubiertus, el cuchillu, el teneol y la cuchal (prural “cucharis”).

Econ estas palabras, podemus jadel frasis comu:

·        La mi agüela siempri tenía el pucherinu a la lumbri con el café

·        La sartén se toca con la cuchal y el deal

·        ¿Lú p’andi hi puestu la cuchal?

·        Ahí está’l pucheru con las patatis, es lo qu’hai pa comel hoi

¡Qué bien vieni un pratu sopa cuandu jadi fríu!

Los nombris de los bailis

    Esta semana vamus a deprendel los nombris de los bailis y los istrumentus. d'El Rebollal. Apencipiamus polus istrumentus. 

    N’El Rebollal se tocan, de mó y manera tradicional, éstus istrumentus: el panderu que tocan las pandereras (en Peñaparda), la sartén de las sarteneras (en Payu), la gaita y el tamboril de los tamborilerus (en tolus pueblus) y las castañuelas qu’ussan los bailaoris.

Con estus istrumentus, se jadin, entri otrus, estus bailis:

·        La charrá primera, la charrá segunda, el fandangu y repicoteáu, y la jota en Payu

·        L’ajecháu o primeru, el salteáu o sorteáu, el corríu brincáu y l’ofretoriu en Peñaparda

·        El son, la jota, la jota de dos pasus y el fandangu en Robrea.

Econ estas palabras, podemus jadel frasis comu:

·        El tocal el panderu no da de comel, peru pol si s’ofreci güenu es el sabel

·        Un baili sin castañuelas, sin tamboril y sin gaita es comu el que tieni tosi y la barriga s’arrasca

·        La sartén se toca con una cuchal y con un deal

L’ajecháu es el primeru

El verbu HABEL

     Vamus a deprendel un poquinu alreol el verbu HABEL. 

    Apencipiamus con el presenti del verbu HABEL:

Yo HI  /  Tú HAS  / Él HA  /  Nusotrus HIMUS  /  Vusotrus HÉIS  / Ellus HAN

El verbu HABEL s’ussa, entri otras cosas, pa:

·        Jadel el pasáu compuestu: hi veníu, has jechu, ha bailáu,...

·        Palral de cuandu las cosas están: hai un cochi, hai dos mujeris,...

·        Palral del tiempu qu’ha pasáu dendi un jechu: ya hai tiempu que vinu, hai una semana qu’está aquí,...

Asina, podeus jadel frasis comu:

·        Esti añu himus gastáu muchu dineru

·        Hi veníu en cuantis qu’hi podíu

·        ¿Héis cogíu los tomatis?

·        Ya hai tiempu que lo conozu

·        Esti añu hai mucha agua en los regatus

El güertu

     Vamus a deprendel palabrinas alreol los güertus. 

Lo primeru, craru, es la palabra güertu, qu’es el cachinu tierra dondi sembramus las cosas. Antis de sembral, tenemus de preparal la tierra, pa esmigajal los terronis y jadel los jurcus.

Pa trabajal la tierra ussamus jerramientas comu l’aráu o la sacha. Entri las cosas que podemus jadel nel güertu tenemus: aral, sembral, regal, sachal, arical,...

Pa sembral mos jadi falta la simienti y, entri las cosinas que podemus sembral, tenemus: frejonis, tomatis, ensalá, millu, garbanzus, arvillas, calabacinis, patatis, pimientus, azenorias, calabazas, berzas, colifroris,...

Tó estu, pa que dé frutu, lo tenemus de regal, jadiendu correl polus cañus l’agua que sacamus de los podus y las podas.

 Con estas palabrinas, podemus jadel frasis comu:

-         Esti añu, las patatis han salíu chicas.

-         ¡Menúus tomatis s’han dáu esti añu!

-         Nel nuestru güertu se dan mú bien los frejonis verdis.

-         Me gusta arrecogel las arvillas y comelas de verdis.

-         Lo calabacinis tenemus de sembralus en las orillas del güertu, que corrin muchu.

Comu s’ensequi la poda no vamus a podel regal.