El ganáu

     Vamus a apencipial polas crasis de ganáu. Los más grandis eran los güés o bués, que s’ussa pa calni y s’ussaba pa tiral d’aperus, comu’l carru o l’aráu. Tamién pa lo mesmu, anque más chicas, son las vaquis (prural de vaca), y de las que sacamus tamién la lechi, y los torus. Las crías son los bederrus. 

     Otras crasis de ganáu, éstus sin cuernus, son los caballus, los burrus y los mulus, que s’ussaban p’acarreal y pa tiral d’aperus. La cría del caballu es el potru, y la del burru el buchi. Algu más chicas son las ovejas y las cabras. Las crías de las ovejas son los borregus, y las de las cabras los chivinus o cabritus.

     Tamién se crían en los nuestrus pueblus los gorrinus, marranus o cerdus, de los que s’aprovecha tó. Y, ya con prumas y picu, las gallinis (prural de gallina) o pitas, y los gallus o pitus, de los que s’aprovechan la calni y los güevus. Las crías son los pollus y pollas (comu la de la toná).

     Seguimus con otrus animalis, que se tenían en cassa, anque no son ganáu comu tal, son los perrus, que sirvin pa cudial el ganáu, los gatus, pa preseguil ratonis y ratis, y las palombas, de las que s’aprovechaba la calni y los güevus.

Los achiperris de la codina

     Vamus a deprendel cómu se llaman los achiperris qu’ussamus en la codina. 

P’apencipial, la codina, qu’antañu tenía un vassal, una cantaera, la mesa, las sillas y, muchas vedis, un escañu y unus sillus p’arrimalsi a la lumbri.

Pa codinal s’ussaban, ademas de la sartén, los pucherus, que s’arrimaban a la lumbri pa jadel la comía, el café,... Más nuevas son las caduelas. Tampocu no faltaba un calderu colgáu de las llaris pa tenel agua calienti siempri.

Una vés sentáus a la mesa podiamus ponel en ellas los pratus pa comel, los vasus pa bebel y, comu cubiertus, el cuchillu, el teneol y la cuchal (prural “cucharis”).

Econ estas palabras, podemus jadel frasis comu:

·        La mi agüela siempri tenía el pucherinu a la lumbri con el café

·        La sartén se toca con la cuchal y el deal

·        ¿Lú p’andi hi puestu la cuchal?

·        Ahí está’l pucheru con las patatis, es lo qu’hai pa comel hoi

¡Qué bien vieni un pratu sopa cuandu jadi fríu!

Los nombris de los bailis

    Esta semana vamus a deprendel los nombris de los bailis y los istrumentus. d'El Rebollal. Apencipiamus polus istrumentus. 

    N’El Rebollal se tocan, de mó y manera tradicional, éstus istrumentus: el panderu que tocan las pandereras (en Peñaparda), la sartén de las sarteneras (en Payu), la gaita y el tamboril de los tamborilerus (en tolus pueblus) y las castañuelas qu’ussan los bailaoris.

Con estus istrumentus, se jadin, entri otrus, estus bailis:

·        La charrá primera, la charrá segunda, el fandangu y repicoteáu, y la jota en Payu

·        L’ajecháu o primeru, el salteáu o sorteáu, el corríu brincáu y l’ofretoriu en Peñaparda

·        El son, la jota, la jota de dos pasus y el fandangu en Robrea.

Econ estas palabras, podemus jadel frasis comu:

·        El tocal el panderu no da de comel, peru pol si s’ofreci güenu es el sabel

·        Un baili sin castañuelas, sin tamboril y sin gaita es comu el que tieni tosi y la barriga s’arrasca

·        La sartén se toca con una cuchal y con un deal

L’ajecháu es el primeru

El verbu HABEL

     Vamus a deprendel un poquinu alreol el verbu HABEL. 

    Apencipiamus con el presenti del verbu HABEL:

Yo HI  /  Tú HAS  / Él HA  /  Nusotrus HIMUS  /  Vusotrus HÉIS  / Ellus HAN

El verbu HABEL s’ussa, entri otras cosas, pa:

·        Jadel el pasáu compuestu: hi veníu, has jechu, ha bailáu,...

·        Palral de cuandu las cosas están: hai un cochi, hai dos mujeris,...

·        Palral del tiempu qu’ha pasáu dendi un jechu: ya hai tiempu que vinu, hai una semana qu’está aquí,...

Asina, podeus jadel frasis comu:

·        Esti añu himus gastáu muchu dineru

·        Hi veníu en cuantis qu’hi podíu

·        ¿Héis cogíu los tomatis?

·        Ya hai tiempu que lo conozu

·        Esti añu hai mucha agua en los regatus

El güertu

     Vamus a deprendel palabrinas alreol los güertus. 

Lo primeru, craru, es la palabra güertu, qu’es el cachinu tierra dondi sembramus las cosas. Antis de sembral, tenemus de preparal la tierra, pa esmigajal los terronis y jadel los jurcus.

Pa trabajal la tierra ussamus jerramientas comu l’aráu o la sacha. Entri las cosas que podemus jadel nel güertu tenemus: aral, sembral, regal, sachal, arical,...

Pa sembral mos jadi falta la simienti y, entri las cosinas que podemus sembral, tenemus: frejonis, tomatis, ensalá, millu, garbanzus, arvillas, calabacinis, patatis, pimientus, azenorias, calabazas, berzas, colifroris,...

Tó estu, pa que dé frutu, lo tenemus de regal, jadiendu correl polus cañus l’agua que sacamus de los podus y las podas.

 Con estas palabrinas, podemus jadel frasis comu:

-         Esti añu, las patatis han salíu chicas.

-         ¡Menúus tomatis s’han dáu esti añu!

-         Nel nuestru güertu se dan mú bien los frejonis verdis.

-         Me gusta arrecogel las arvillas y comelas de verdis.

-         Lo calabacinis tenemus de sembralus en las orillas del güertu, que corrin muchu.

Comu s’ensequi la poda no vamus a podel regal.

Las coloris

     Vamus a deprendel cómu llamamus n’El Rebollal a las coloris. 

P’apencipial, tenemus de mental que la palabra COLOL, en la nuestra palra, es fememinu, asina qu’ussamus la colol y las coloris.

Las coloris de siempri en la palra d’El Rebollal son: brancu, amarillu, naranja/laranja, rosa, coloráu/roju, marrón, verdi, azul, moráu/lila, gris y negru.

Pa las coloris del pelu tenemus: brancu/canu, morenu/negru, rubiu/roju y marrón/castañu y coloráu.

Con estas coloris, podemus jadel frasis comu:

-         La vaca ya es vieja, ya tieni’l pelu canu.

-         El pañuelu que me distis tenía las froris azulis.

-         Las moras entovía están verdis, no se puedin comel.

-         El mi perru tieni’l pelu brancu.

-         Ponti la saya colorá.

L’agüela iba siempri de negru.

Los númerus

     Vamus a chalral alreol de los númerus, que son palabrinas que tós ussamus tolus días, ya sea pa dal la hora, pa idil cuánta familia tenemus, pa mental cuánta genti vivi, o palra,... Comu podemus vel, son apaecíus a los del castellanu o el portugués, algu normal pos tóas tres son lenguas que vienin del latín. Asina ussamus los númerus n’El Rebollal. 

Apencipiamus con los que podemus contal con los déus de las manus: unu (1), dos (2), tres (3), cuatru (4), cincu (5), séis (6), sieti (7), ochu (8), nuevi (9) y diés (10). Cuandu no hai ningunu, sería’l ceru (0).

Lo númerus que siguin, del diés p’arriba, son: onci (11), dodi (12), treci (13), catorci (14), quinci (15), dieciséis (16), diecisieti (17), dieciochu (18), diecinuevi (19), venti (20).

Del númeru dodi vieni dodena, palabra qu’ussamus, pol ejempru, pa pedil dodi güevus.

Del venti p’alantri, los númerus se jadin añuyendu, a la decena, los númerus cendillus: ventiunu (21), ventidós (22), ventitrés (23), venticuatru (24), venticincu (25), ventiséis (26), ventisieti (27), ventiochu (28), ventinuevi (29). 

Las decenas, del venti p’alantri, comu podemus vel, son las que más s’apaecin a los númerus en la lengua oficial: venti (20), trenta (30), cuarenta (40), cincuenta (50), sesenta (60), setenta (70), ochenta (80), noventa (90), cien/cientu (100).

Del trenta p’alantri, los númerus se jadin añuyendu, a la decena, los númerus cendillus, uñíus (o desapartáus) pola conjunción "y": trenta y unu (31), cuarenta y dos (42), cincuenta y tres (53), sesenta y cuatru (64), setenta y cincu (75), ochenta y seis (86), noventa y sieti (97),...

Con tó éstu, podemus jadel frasis comu:

-         El mi dagal ya tieni sieti añus.

-         El Rebollal tieni cincu pueblus: Navafrías, Payu, Peñaparda, Villarrubias y Robrea.

-         ¡Dami una dodena güevus, de los baratus!

-         La tu agüela ya tieni ochenta y cincu añus.

Esu cuesta cuatru perras, no es caru.