Apencipiamus
con la palabra cassa, nombri qu’es
de los que guardan la “s sonora” y que nusotrus escribimus con dos “SS”. En los
nuestrus pueblus, sigún el terrenu que tuviera la cassa, se podían tenel,
además del corral, una tená dondi guardal el ganáu y aperus de
labranza, y un güil, dondi dormía y
s’apajaba’l ganáu. Además, en la parti alta d’estas otras “cassas” podía habel
un pajal, dondi guardal las alpacas de
paja pa dali de comel al ganáu nel Inviernu.
Ya en la cassa prencipal, encontramus
diferentis partis, comu la codina,
dondi se jadía la vía normal, con la su chiminea
con las llaris de las que siempri
colgaba un calderu pa tenel agua calienti, los vasalis pa los vasus y pratus,
las cantaeras pa los cántarus, pucherus (tamién vasus y pratus), el escañu pa sentalsi o echalsi a reposal
la comía, la mesa, las sillas y sillus p’arrimalsi a la lumbri,... Tamién en la
parti baja las cassas estaban los cilleirus,
dondi dormía la genti en camas o catris de jierru que, con el tiempu
tuvun colchonis de lana. Antis d’habel bañu en las cassas (que no siempri lo
tuvun), se tenía en los cilleirus una palangana con agua pa lavalsi a las
mañanas, y un orinal pol baju la cama, pa si jadía falta a la nochi.
