Palabrinas alreol el fuegu

     Vamus a conocel angunas palabrinas alreol de la Naturaleza.

Apencipiamus polus lugaris con agua: la llevan los ríus, regatus,... Y la hai en las juentis, podus y podas. 

Polus caminus podemus il polus bosquis, polus práus, y llegal jasta los cotorrus, los montis y los picus.

Nel caminu podemus encontral animalis comu las dorras, los pardalis, agudanievis, pegas, guarrus, gurullas, bujus, jabalinis,...

     Sin olvialmus de los animalis que tenemus en los nuestrus corralis: burrus, gorrinus, vaquis, gallinis, perrus, gatus,...

     Asina, podemus jadel frasis comu:

• El ríu del mi pueblu lleva poca agua esti añu
• La vedina tieni los burrus nel práu
• Mos salió una dorra nel caminu Payu
• ¡Mirái qué pardalis tan políus!

Palabrinas alreol el fuegu

Esti tiempu l’Inviernu es tiempu de jadel lumbri pa espantal el fríu. Vamus a deprendel angunas palabrinas alreol el fuegu en la palra d’El Rebollal. 

Apencipiamus con los nombris que le damus a los fuegus. La que se jadi en la chiminea es la lumbri. Si es mú chica, es una chamaína. Las que se jadin pa las fiestas son las Luminarias, Lumbrinarias, Capazus o Fogueras.

Ussamus dos verbus pa jadel la lumbri: chiscal (pol esu el nombri de chisqueru pa los “mecheros”) y arcendel. D’esti verbu vieni la palabra arcendajas, qu’ussamus pa la leña chica qu’ayúa a arcendel la lumbri. Pa esa mesma leña, además d’arcendajas ussamus la palabra taramas.

Otrus palus que tienin nombri son el trashugueru, qu’es el palu grandi que se poni detrás y sostieni la lumbri, y los padrinus, que son los que se ponin a los láus,

La lumbri ya chiscá suelta morceñas o pavesas, que son las cosinas que salin p’arriba ardiendu. Cuandu ya no hai llama quea’l borraju, que vali pa’l braseru y p’asal carni. Y, cuandu s’ha quemáu todu, quea la cenida.

Asina, podemus jadel frasis comu:

·        Tengu de cogel unas arcendajas pa chiscal la lumbri

·        La mi agüela siempri tenía el pucheru’l café a la lumbri

S’está muriendu la lumbri, no quea más qu’una chamaína 

Nombris de lugal

    Esta semana vamus a vel cómu llamamus a angunus pueblus y lugaris en la palra d’El Rebollal. 

Apencipiamus polus pueblus d’El Rebollal, que somus cincu: Navafrías, Payu, Peñaparda, Robrea y Villarrubias. Antañu tamién juerun pueblus Perosín y El Villal.

Los pueblus d’alreol los llamamus asina: Las Casillas, Guinaldu, Itueru, L’Alberguería, Campillu, Saúgu, Martiagu, Pastoris,... Jasta llegal a la cabeza la comarca: Ciarrodrigu.

Tampocu no mos olviamus de los pueblus de la Estremaúra y de Portugal. Asina tenemus: L’Acebu, La Torri, Santibáñis, San Martín, Treveju, Los Joyus, Los Fayatis, El Sotu,...

Asina, podemus jadel frasis comu:

·        - Venimus de los Sanjuanis de Robrea       

      - Vamus a Peñaparda a la Luminaria

      -  L’otru día estuvimus a Ciarrodrigu

Los mesis del añu

    Agora qu’apencipiamus un nuevu añu, vamus a deprendel cómu llamamus a los mesis n’El Rebollal. Comu veréis, apaecin muchas de las regras qu’himus mentáu n’otrus programas, comu l’afechal las vocalis en –U e –I o l’aspiración de la F- latina jadiendula J-. Asina llamamus a los mesis n’El Rebollal:

Eneru / Jebreru / Marzu /Abril / Mayu / Juniu / Juliu /Agostu / Setiembri / Otubri /Noviembri /Diciembri

Comu héis vistu, tampocu no son compricáus, s’apaecin a los de las otras lenguas que vienin del latín. Con esu podemus jadel muchas frasis

·        El añu apencipia nel mes d’Eneru

·        Jebreru es el mes más cortu l’añu

·        Nel mes de Marzu apencipia la Primavera

·        El mes d’Abril vieni con 30 días

·        Mayu es el mes de las froris

·        Nel mes de Juniu apencipia’l Veranu

el   En Juliu jadi muchu calol

N  Nel mes d'Agostu es cuandu más genti está de vacancias

     En Setiembri apencipia'l Tardíu

     Nel mes d'Otubri salin los jongus

     En Noviembri son los Santus

     L'añu acaba nel mes de Dicembri

           Los nombris de los mesis de Jebreru y Marzu dan nombri a cambius de tiempu, sigún nel mes qu’estemus. Los cambius de tiempu nel mesmu día del mes de Jebreru son las “jebrerás”, y los del mes de marzu son las “marzás”.

Las palabrinas de la Navidá

Hoi, tan cerquinina de la Navidá, vamus a chalral de las palabras qu’ussamus pa mental estas fiestas tan señalás. 

•  Lo primeru, comu no puedi sel menus, es la Navidá (o, en prural, las Naviadis), qu’apencipia en la Nochigüena.
•  L’añu acaba’l día l’Añu Vieju y apencipia’l día l’Añu Nuevu. Entri dambus dos está la Nochivieja.
• Otru día señaláu es el Día los Reyis, qu’es cuandu los dagalis (y los mayoris) recibin los regalus.
• Pa felicital ussamus el ¡Felís Navidá! pa felicital las Naviadis, y el ¡Felís Añu Nuevu! pa felicital l’Añu Nuevu. 

La familia

 Hoi vamus a chalral alreol de los parientis. 

• Lo primeru son los padris: el padri y la madri.
• De los padris nacierun los hijus, o los dagalis: el hiju y la hija, peru tamién el dagal y la dagala.
• Los dagalis, entri ellus, son hermanus: l’hermanu y la hermana.
• Los padris de los mis padris son los mis agüelus: los agüelus pol parti’l padri y los agüelus pol parti la madri, y en cá pareja d’agüelus, l’agüelu y l’agüela.
• Los agüelus tienin nietus: el nietu y la nieta.
• Los hermanus de los mis padris son los mis tíus: el tíu y la tía. Peru ¡CUDIÁU! Tamién son tíus tuyus los tíus de los tus padris. N’El Rebollal no desapartamus comu nel castellanu, no tenemus “tíos abuelos”.
• Los dagalis de los tus tíus son los tus primus: el primu y la prima. Tamién son primus los primus de los tus padris.
• Los dagalis de los hermanus son los sobrinus: el sobrinu y la sobrina. ¡CUDIÁU! Tamién son sobrinus los dagalis de los sobrinus, n’El Rebollal no tenemus “sobrinos nietos”.
• En drentru la familia política tenemus el cuñáu y la cuñá, el suegru y la suegra, el yernu (tamién el nueru) y la nuera, y el compadri y la comadri. Compadri  (o comadri) tamién es un parienti religiosu: es el qu’ha bautizáu al tu dagal.

Los saludus

 Hoi vos vamus a apriendel cómu saludamus y despedimus a la genti en la palra d’El Rebollal. Apencipiamus con los saludus: 

•  P’apencipial el día: ¡Gúenus días mus dé Dios!
• A la tardi: ¡Güenas tardis mus dé Dios!
• A la nochi: ¡Güenas nochis mus dé Dios!

Pa despedilsi:

• Jasta dispués (si vas a golvel a vel esi día a la presona)
• Jasta otru ratinu (si vas a golvel a vel a la presona, peru no sabis cuándu)
•  Jasta mañana si Dios quieri (si te despidis jasta’l sotru día)
• Jasta más vel (si no sabis cuándu val a golvel a vel a la presona)

Además, otrus mó y manera de saludalsi y despedilsi son:

•  ¡Hola! El saludu más cortu en tolas lenguas.
•  Otru saludu es idil el nombri del que saludas.
• ¡Adiós! La despedida más corta en tolas lenguas.
• Vai con Dios! El “adiós largu”, se le idi a anguién que se va del lugal andi estáis n’esi momentinu.